2010-12-20

མ་མཐོང་དྲིན་ཅན་ཞིག་ལ་མྱ་ངན་ཞུ།

༄༅།། ངས་མཁས་དབང་འཇམ་དབྱངས་རྣམ་རྒྱལ(E. Gene Smith 1936-2010)ཐེངས་གཅིག་ཀྱང་མཇལ་མ་མྱོང་ལ། ཁོང་དང་ཡིག་འབྲེལ་ཙམ་ཡང་བྱུང་མ་མྱོང་། འོན་ཀྱང་ང་རང་སྒེར་དང་བོད་ཀྱི་རིག་གཞུང་། བོད་ཀྱི་རིག་གཞུང་ལ་དོན་གཉེར་ཡོད་པ་ཚང་མར་ཁོང་ནི་བཀའ་དྲིན་ཅན་ཞིག་ཡིན་པར་ངོས་འཛིན་ཞུ་བཞིན་ཡོད།

རང་ཉིད་སྐྱབས་བཅོལ་བ་ཞིག་ཡིན་པའི་ཆ་ནས་དཔེ་ཆ་མང་པོ་བླུ་ཡོན་ཞུ་མི་ཐུབ་ལ། ཞུ་ཐུབ་པའི་དབང་དུ་བཏང་རུང་དེ་དག་འཇོག་སའི་ཁང་མིག་ཀྱང་མེད། འོན་ཀྱང་མཁས་དབང་འཇམ་དབྱངས་རྣམ་རྒྱལ་གྱིས་སྐུ་ཚེའི་རིང་དཔེ་ཆ་སྟོང་ཕྲག་དུ་མ་བསྡུ་རུབ་དང་ཉར་ཚགས་གནང་སྟེ། དོན་གཉེར་ཅན་ཀུན་ལ་དྲྭ་ཐོག་ནས་རིན་མེད་དུ་བལྟ་ཆོག་བཟོས་པའི་བཀའ་དྲིན་གྱིས། ང་ལྟ་བུའི་མི་མང་པོ་ཞིག་ལ་ཕན་ཐོགས་ཧ་ཅང་ཆེན་པོ་བྱུང་དང་འབྱུང་བཞིན་ཡོད།

ང་རང་དཔེ་ཆ་ཀློག་པར་དགའ་ཞིང་ཉམས་ཞིབ་དང་རྩོམ་སྒྱུར་བྱེད་པར་སྤྲོ་བ་ཞིག་ཡིན། ཉིན་ལྟར་ངས་རང་གི་དགའ་མོས་ཡོད་པའི་ལས་ཀ་དེ་དག་བྱེད་སྐབས། ང་ལ་མཁོ་སྤྱོད་ཆེ་ཤོས་ཀྱི་དྲྭ་རྒྱ་ནི་མཁས་དབང་འཇམ་དབྱངས་རྣམ་རྒྱལ་གྱིས་འགོ་འཛུགས་གནང་བའི་ www.tbrc.org འདི་ཡིན། བརྗོད་བྱ་དང་རྩོམ་པ་པོ་སོགས་ཀྱི་ཆ་ནས་སྡེ་ཚན་ལེགས་པར་ཕྱེ་བས་འཚོལ་བདེ་ཞིང་། དཔེ་ཚན་རེ་རེར་ཡང་ངོ་སྤྲོད་ལྡན་པ། བཀོད་སྒྲིག་ཞིབ་ཚགས་ཆེ་ཞིང་། ལྟ་ཀློག་བདེ་བའི་བོད་ཀྱི་རིས་མེད་ཀྱི་དཔེ་ཆ་རྩ་ཆེན་དེ་ཙམ་གྱི་མང་པོ་ཞིག །དཀའ་ཚེགས་ཅི་ཡང་མེད་པར་འཛམ་གླིང་ས་ཕྱོགས་ཀུན་ནས་རིན་མེད་དུ་བལྟ་ཀློག་དང་པར་བཤུས། འཕབ་ལེན་ཐུབ་པའི་ཆོས་ཀྱི་སྦྱིན་པ་རླབས་པོ་ཆེ་འདི་འདྲ་ནི་ད་ཕན་ལོ་རྒྱུས་ཐོག་བྱུང་མྱོང་མེད་པ་ཞིག་རེད་ལ། འདིའི་ཕན་ནུས་ཀྱང་ཚད་བཟུང་བྲལ་བ་ཞིག་རེད།

དེར་བརྟེན། འདི་འདྲའི་ཕན་ཐོགས་ཅན་གྱི་བྱ་བ་རླབས་པོ་ཆེ་རྩོམ་མཁན། མ་མཇལ་མ་འདྲིས་པའི་མཛའ་གྲོགས་དྲིན་ཅན་གང་དེ་དུས་ཀྱི་ཆོས་ཅན་དུ་གྱུར་པར་མྱ་ངན་གུས་འདུད་ཡོད། བཞུགས་སྒར་དྷ་རམ་ས་ལ་ནས། ཕྲན་ཆུང་ཚེ་རིང་པས། ཐེག་ཆེན་ཆོས་གླིང་གཙུག་ལག་ཁང་དུ་གུས་མཚོན་སྣང་གསལ་གྱི་མཆོད་པ་དང་བཅས་ཕུལ།། །།