2013-07-08

ཆུ་མོའི་གཞུང་གི་ལོ་མ།

ཆུ་མོའི་གཞུང་གི་ལོ་མ་ཡིས།།
དལ་གྱིས་འཕྱོ་བའི་རྦ་རླབས་བསྙེགས།།
ནམ་མཁའི་མཐོངས་ཀྱི་གླག་རྒོད་ཀྱིས།།
ས་གཞི་ཆེན་པོར་གྲིབ་ནག་ཕབ།།
ཁྱེད་རང་རྦ་རླབས་ཡིན་པ་འདྲ།།
ང་རང་གྲིབ་མ་ཡིན་ཡང་ཆོག །
 

དལ་གྱིས་འབབ་པའི་ཁ་བ་དེ།།
སེམས་ཀྱི་ལག་ནང་བཞུ་ལ་ཁད།།
ལོ་མའི་སྟེང་གི་ཟིལ་པ་དེ།།
ལྷམ་གྱི་རྡོག་པས་གཏོར་ལ་ཁད།།
ཁྱེད་རང་ཁ་བ་ཡིན་ནམ་མིན།།
ང་ནི་ལྷམ་དེ་གཏན་ནས་མིན།།

སྙིང་ལ་སིམ་པའི་རི་མོ་དེ།།
རྣ་བར་སྙན་པའི་རོལ་མོ་རེད།།
འགྱུར་ཁུགས་རེ་རེའི་བར་མཚམས་ནས།།
ཁྱེད་ཀྱི་དགའ་སྐྱོའི་རྣམ་འགྱུར་མཐོང་།།
ཁྱེད་ཀྱི་འགྱུར་མེད་སྙིང་ཡང་རིག

གྲང་ངད་ཆེ་བའི་དགུན་དུས་འདིར།།
སེམས་པ་དྲོད་པའི་མེ་ཞིག་ཡོད།།
ཁེར་གདུང་ཆེ་བའི་མཚན་མོ་འདིར།།
ལག་པ་བསྲིངས་སའི་ཁྱེད་རང་ཡོད།།
ཁྱེད་རང་རོལ་དབྱངས་མེ་ལྕེ་རེད།།
ང་རང་གཞས་ཚིག་མེ་ཤིང་ཡིན།། །།