2013-06-26

སྙིང་གི་འཕར་རྩས་མཚོན་པ།

སྙིང་གི་འཕར་རྩས་མཚོན་པའི་རི་བོ་འདི།།
ཇི་ཙམ་བརྟན་ཀྱང་ན་བུན་སངས་དུས་བྲལ།།
རླུང་ནང་མར་མེས་མཚོན་པའི་མེ་ཏོག་དག །
ཇི་ལྟར་མཛེས་ཀྱང་དེ་ལྟར་མི་རྟག་ཉིད།།

ཆུ་འགྲམ་རྐང་རྗེས་ཟུབ་ངེས་ཁོ་བོས་ཤེས།།
ཆང་གི་མངར་ཁར་སྐྱུར་རྩི་འདྲེས་པའང་རྟོགས།།
ཁས་ལེན་དམ་བཅས་མནན་པའི་སྙན་ངག་རྣམས།།
ཞག་པོ་གཅིག་ལ་འགྱུར་སྙམ་ཡིད་ལ་མེད།།

སྐད་ཅིག་གཅིག་ལ་བཅད་པའི་འབྲེལ་ཐག་འདི།།
ལོ་ངོ་ཟླ་ངོར་རིང་བ་སུ་ཡིས་ཤེས།།
ཆུ་ཆེན་ཐོག་གི་ཤིང་ཟམ་ཐབས་སྡུག་འདིས།།
ནམ་ཕུགས་འཁྱོལ་བའི་ཡིད་ཆེས་སྔར་ནས་མེད།།