2013-12-16

འགྲམ་ཆང་།

སྤྲིན་བཞིན་རྒྱུ་བའི་རླངས་པ་དེ་ཡི་འོག །
མཆུ་སྒྲོས་འཛུམ་པའི་འོད་ཀྱིས་ཁྱབ་པ་ཡི།།
ཞལ་ཟས་ཆང་གི་རོ་ཡིས་སྙེམས་པ་དེ།།
སྙིང་ཁ་འགུལ་བའི་རོལ་དབྱངས་བཞིན་དུ་མཚར།།

ཁང་ཆུང་དཀར་པོའི་སྒོ་ཆུང་དེ་ག་ནས།།
ཁྱེད་ཀྱི་རྒྱབ་གཟུགས་དེ་ལ་རྣམ་པར་འཁྲེན།།
རང་བཞིན་གཤིས་ཀྱིས་ཉེ་བའི་ཁྱེད་དང་ང་།།
ཧ་ཅང་ཉེ་ཡང་ཧ་ཅང་ཧ་ཅང་རིང་།།

གཞན་དང་མི་གཅིག་གཤིས་ཀའི་ཚེར་མ་འདིས།།
ང་རང་མེ་ཏོག་ལྡུམ་རར་ཚུད་མི་སྲིད།།
ལག་པ་བསྲིངས་སའི་རི་དེ་འགྱུར་བ་ནས།།
རི་སྐྱེས་ང་རང་རི་བོ་གང་ལ་འཁེན།།

མངར་ཟས་དེ་ཡིས་དྲངས་པའི་ཤིང་ཏོག་དག །
ཁྱེད་ལ་དབུལ་ལོ་ང་ཡི་སེམས་པ་ཡིན།།
ཆང་རག་མི་བཞེས་ཁྱེད་ལ་འགྲམ་ཆང་ཡོད།།
ཅི་འདོད་འཐུང་ལ་སྐྱུར་འགོང་གསུངས་པར་མཛོད།།

ཁོ་བོ་འདི་ལྟར་བཟི་བཞིན་སྙན་ངག་གྱེར།།
ལོ་མ་སེར་པོར་མིག་ཆུ་བྲན་བཞིན་འགྲོ།།
ཁོ་བོ་འདི་ལྟར་ངུ་བཞིན་དགོད་ཁ་སློང་། །
ལྗང་མདོག་ལོ་མར་སེམས་པ་གཏད་ནས་འགྲོ།། །།

No comments:

Post a Comment