2009-08-01

ཨ་རིའི་སྲིད་འཛིན་བྷུ་ཤིའི་གསུང་བཤད།

༧གོང་ས་མཆོག་ལ་ཨ་རིའི་གྲོས་ཚོགས་ཀྱི་གཟེངས་རྟགས་མཐོ་ཤོས་གསེར་གྱི་རྟགས་མ་འབུལ་བཞེས་ཀྱི་མཛད་སྒོ་ཆེན་མོའི་ཐོག་ཨ་རིའི་སྲིད་འཛིན་བྷུ་ཤེ་མཆོག་གིས་གནང་བའི་གསུང་བཤད།

༼གསེར་གྱི་གཟེངས་རྟགས་མཛད་སྒོ་དང་འབྲེལ་བའི་གསུང་བཤད་ཆ་ཚང་ཕྱི་དྲིལ་ཤེས་བྱ་གསར་ཁང་གིས་བསྐུལ་བ་ལྟར་བསྒྱུར་ཅིང་ཤེས་བྱ་གསེབ་དེབ་ཐོག་བཀོད་ཡོད།༽

གྲོས་ཚོགས་ཚོགས་གཙོ་མཁྱེན་ལྡན་མ་མཆོག་དང༌། གྲོས་ཚོགས་གོང་མའི་འཐུས་མི་བྷའེ་ར་ཌེ༌ (Byrd) མཆོག
།གྲོས་ཚོགས་ཀྱི་སྐུ་ཚབ་རྣམ་པ། སྒོས་སུ་གྲོས་ཚོགས་གོང་མའི་ཚོགས་མི་ཧྤེ་ཨན་སེ་ཊན་(Feinstein)དང༌། གྲོས་ཚོགས་ཚོགས་མི་མཁྱེན་ལྡན་མ་ཨེ་ལི་ན་ རོ་སེ་ལེ་ཊི་ནན། (Ileana Ros-Lehtinen) ཞིང་གཤེགས་གྲོས་ཚོཌ་གོང་མའི་ཚོགས་མི་ཐོ་མ་སེ།(Thomas) གཟི་བརྗིད་དང་ལྡན་པའི་སྐུ་མགྲོན་རྣམ་པ།
ཡང་སྒོས་ང་ཚོའི་གྲོགས་མཆེད་ཨི་ལའེ་ ཝི་སལ་(Elie Wiesel)དང༌། ྋགོང་ས་ྋསྐྱབས་མགོན་ཆེན་པོ་མཆོག་བཅས་ལ་ཞུ་རྒྱུར།

འདས་པའི་ལོ་མང་པོའི་རིང་གྲོས་ཚོགས་ཀྱིས་གསེར་གྱི་རྟགས་མ་འདི་ལོ་རྒྱུས་ཐོག་གི་རླབས་ཆེའི་མི་སྣ་མང་པོར་ཕུལ་ཡོད་ཅིང༌། དེ་ཡང་རྒྱུན་དུ་ཁོང་རྣམ་པའི་འབད་འཐབ་མཇུག་བསྒྲིལ་ཏེ་རྒྱལ་ཁ་ཐོབ་ཟིན་པར་འབུལ་གྱི་ཡོད། དེ་རིང་གྲོས་ཚོགས་ཀྱིས་ནམ་རྒྱུན་དང་མི་འདྲ་བ་ཞིག་གནང་རྒྱུ་བདམས་གནང་བ་རེད། དེ་ཡང་གྲོས་ཚོགས་ཀྱིས་གཟེངས་རྟགས་འདི་གང་གི་མཛད་འགན་མུ་མཐུད་སྐྱོང་བཞིན་པ་དང༌། གྲུབ་འབྲས་ཇི་འབྱུང་ངེས་པ་མེད་པའི་སྐྱེས་བུ་ཞིག་ལ་ཕུལ་བ་རེད། དེ་ལྟར་འབུལ་ལམ་ཞུས་པ་འདི་ནི། ཨ་མི་རི་ཀས་སྐྱེ་བོ་ཀུན་ལ་ཆོས་དད་རང་མོས་དང་འགྲོ་བ་མིའི་གཞི་རྩའི་ཐོབ་ཐང་དགོས་པའི་ཐད་རང་གི་འབོད་སྒྲ་སྐད་གསང་མཐོན་པོས་བསྒྲགས་པ་ཞིག་རེད། རིན་ཐང་འདི་གཉིས་ཀྱིས་ང་ཚོའི་སྤྱི་མཐུན་རྒྱལ་ཁབ་མདུན་བསྐྱོད་དང༌། ཚོད་བགམ་མང་པོའི་ནང་ནས་ཡུན་གནས་ཐུབ་པ་བྱུང་ཡོད་ལ། དེས་ང་ཚོ་ཆོད་སེམས་འགྱུར་མེད་དང་རྣམ་དཔྱོད་ལྡན་པའི་སྒོ་ནས་བོད་ཀྱི་མི་མང་དང༌། དེ་རིང་ང་ཚོས་མངོན་བསྟོད་ཞུ་ཡུལ་སྐྱེས་ཆེན་འདིའི་ཕྱོགས་སུ་དྲངས་པ་རེད།

ཏཱ་ལའི་བླ་མ་མཆོག་ཕོ་བྲང་དཀར་པོའི་ནང་ཐོག་མར་དགའ་བསུ་ཞུས་པ་ནས་ད་བར་ལོ་རབས་གཉིས་ལ་ཉེ་བ་སོང་ཟིན། ང་ཚོའི་སྲིད་དོན་ཚོགས་པ་ཁག་གཉིས་ཀའི་ཚོགས་མི་དང་འཛམ་གླིང་གི་དབུ་འཁྲིད་རྣམ་པས་ྋགོང་ས་ཏཱ་ལའི་བླ་མ་མཆོག་ནི་དད་པ་དང་ལྷག་བསམ་ཟོལ་མེད། ཞི་དུལ་ཅན་བཅས་ཡིན་པར་མཇལ་ཡོད། ཁོང་ལ་ཨ་རིའི་མི་མང་གི་གུས་བཀུར་དང་དུངས་སེམས་ཐོབ་ཡོད་ལ། ཨ་མི་རི་ཀའི་མི་མང་ལའང་ཁོང་གི་གུས་བརྩི་དང་དུངས་སེམས་ཐོབ་ཡོད།

བོད་ནང་ྋགོང་ས་མཆོག་སྐུ་གཞོན་ནུའི་གནས་སྐབས་ནས་གཟིམ་ཁྲིའི་ཉེ་འགྲམ་དུ་རང་དབང་ལྷ་མོའི་སྐུ་བརྙན་ཉར་གནང་མཛད་པའི་ཚུལ་འདི་ཤེས་སྐབས་ང་ཚོ་རྒྱལ་ཁབ་ཅིག་ཡིན་པའི་ཆ་ནས་སྙེམས་པ་ཤོར་སོང༌། ལོ་མང་པོའི་རྗེས་ྋགོང་ས་མཆོག་ཐོག་མར་ཨ་རིར་ཆིབས་བསྒྱུར་གནང་སྐབས། རང་དབང་ལྷ་མོའི་སྐུ་བརྙན་ངོ་མ་ཐག་ཉེ་ས་ནས་གཟིགས་ཐུབ་ཆེད་ནིའུ་ཡོག་གྲོང་ཁྱེར་གྱི་བྷ་ཊེ་རའེ་གླིང་ཁར་(Battery Park)ཆེད་ཕེབས་གནང་བ་རེད། ཁོང་ཝ་ཤིན་ཊོན་ལ་ཐོག་མར་ཆིབས་བསྒྱུར་གནང་སྐབས། གང་གི་གསུང་གིས་གསར་བརྗེའི་ལས་འགུལ་ཞིག་འབྱུང་བར་བྱས་ཤིང་དུས་ད་ལྟའང་འཛམ་གླིང་ཁྱོན་གྱི་སྐྱེས་ཕོ་མོ་ཚོར་ཡར་སྐུལ་ཐེབས་བཞིན་པའི་དྲན་རྟེན་ཁང་སྟེ། ཇེ་ཧྥར་སོན་དྲན་གསོ་ཁང་(Jefferson Memorial)བརྒྱུད་དེ་ཞབས་ཐང་དུ་ཕེབས་ཡོད། ཇེ་ཧྥར་སོན་ནི་རང་དབང་གོང་དུ་མཆོད་པའི་ཨ་རིའི་རླབས་ཆེའི་མི་སྣ་ཞིག་ཏུ་བརྩི་བཞིན་ཡོད། ཁོང་གིས་
ཡུལ་གྲུ་གཞན་དག་གི་ནང་རང་དབང་དང་སྲིད་གཞུང་ཡག་པོ་གཉིས་མི་མཐུན་པར་ཆ་འཇོག་བྱེད་བཞིན་ཡོད་ཀྱང༌། ང་ཚོའི་ཉམས་མྱོང་གིས་རང་དབང་ནི་སྲིད་གཞུང་ཡག་པོའི་རྒྱབ་རྟེན་ལེགས་ཤོས་དེ་ཡིན་པའི་དན་རྟགས་བྱས་ཡོད།

ཅེས་གསུངས་ཡོད། ཆོས་དད་རང་དབང་ནི་འགྲོ་བ་མིའི་སྙིང་ལ་བརྣག་པའི་འདོད་དོན་ཞིག་ཡིན་ལ། འཛམ་གླིང་ཡོངས་ཁྱབ་ཀྱི་བྱིན་རླབས་ཤིག་དང༌། ང་ཚོའི་རྒྱལ་ཁབ་ཀྱི་གཙིགས་མཐོང་ཆེ་བའི་རིན་ཐང་ཡང་རེད། དེ་ནི་ཨ་རིའི་གཞི་རྩའི་ཐོབ་ཐང་གི་ཁྲིམས་ཡིག་ནང་ཆེས་ཐོག་མར་སྲུང་སྐྱོབ་གནང་བ་དེ་རེད། ཁྲིམས་ཡིག་དེས་རྡོ་ཀ་མ་རུའི་སྒོར་དབྱིབས་ཁང་བརྩེགས་ནང་གི་ལྡེབས་རིས་སུ་འཁོད་པའི་སྐུ་བརྙན་ཁག་གི་དོ་བདག་དབུ་འཁྲིད་མང་པོར་ཡར་སྐུལ་ཐེབས་ཡོད་ལ། དེས་ད་ལྟའང་ང་ཚོའི་མི་ཚེ་སྐྱེལ་ཕྱོགས་ལ་ཚད་འཛིན་གྱི་ནུས་པ་ཐོན་བཞིན་ཡོད།

དེ་རིང་ང་ཚོ་གང་དུ་འཛོམས་ས་དེར་ཐུགས་ཞིབ་གནང་དང༌། མང་གཙོའི་མཚོན་རྟགས་རླབས་ཆེན་དུ་གྱུར་པའི་གནས་འདི་ཡེ་ཤུའི་ཁེ་ཐོ་ལིག་གི་ཆོས་སྡེ་ཞིག་དང༌། འཇིའུ་ཆོས་ལུགས་ཀྱི་འདུ་ཁང་ཞིག །ཁ་ཆེའི་ཆོས་ལུགས་ཀྱི་ཕྱག་ཁང་ཞིག །གྷི་རིག་གི་དམ་པའི་མཆོད་ཁང་ཞིག ནང་པ་སངས་རྒྱས་པའི་ལྷ་ཁང་ཞིག་བཅས་དང་ཧ་ཅང་འདྲ་བོ་ཡོད། གང་ཡིན་ཟེར་ན་གོང་གི་དེ་དག་ཚང་མར་རང་རང་གི་མི་ཕྱེད་པའི་དད་མོས་ཅན་གྱི་རྗེས་འཇུག་ཉམས་ལེན་པ་ཡོད་པ་རྣམས་མཉམ་དུ་ཞི་བདེར་གནས་ཡོད། སྣ་མང་རང་བཞིན་འདི་ནི་བརྟན་ལྷིང་མེད་པའི་རྒྱུ་རྐྱེན་མ་ཡིན་པར་སྟོབས་ཤུགས་ཀྱི་འབྱུང་ཁུངས་རེད། (མཚམས་འདིར་ཚང་མས་ཡིད་མོས་ཀྱི་ཐལ་མོ་ཤུགས་ཆེ་བརྡབས།) རང་དབང་འདི་ནི་རྒྱལ་ཁབ་གཅིག་ལ་དབང་བ་ཞིག་མ་ཡིན་པར་འཛམ་གླིང་ཡོངས་ལ་དབང་བ་ཞིག་རེད།

འདས་མ་ཐག་པའི་དུས་རབས་ནང་བྱུང་བའི་རྒྱུན་ལྡན་མ་ཡིན་པའི་སྐྱོ་གནས་ཤིག་ནི། རྒྱལ་ཁབ་མང་པོས་སྐྱེ་བོ་སྒེར་གྱི་རང་དབང་དང་ལེན་བྱས་པ་དང་མཉམ་དུ་ཨུ་ཚུགས་མཁྲེགས་འཛིན་གྱིས་ཆོས་ལུགས་ལ་བཙན་གནོན་བྱེད་པའི་གནས་ཚུལ་ཡང་མིག་མཐོང་ལག་ཟིན་དུ་བྱུང་བ་དེ་རེད། ཨ་མི་རི་ཁས་ཆོས་ལུགས་བཙན་གནོན་གྱི་མཐའ་སྐྱོའི་གནས་སྟངས་མཐོང་བཞིན་དུ་རང་གི་མིག་ཟུང་བཙུམ་པའམ་མ་མཐོང་མདོག་མདོག་གིས་རྒྱབ་བསྟན་ནས་སྡོད་མི་ཐུབ། དེ་ནི་ངས་རྒྱ་ནག་གི་དབུ་འཁྲིད་ཚོར་ཏཱ་ལའི་བླ་མ་མཆོག་རྒྱ་ནག་ཏུ་གདན་ཞུ་དགོས་པའི་ནན་སྐུལ་མུ་མཐུད་བྱེད་པའི་རྒྱུ་མཚན་ཡིན། ཁོང་ཚོས་སྐྱེས་བུ་བཟང་པོ་འདི་མཇལ་སྐབས། ཁོང་འདུམ་སྒྲིག་དང་ཞི་བདེའི་སྐྱེ་བོ་ཞིག་ཡིན་པ་ཤེས་རྟོགས་ཡོང་གི་རེད།(ཡིད་མོས་ཀྱི་ཐལ་མོ་ཤུགས་ཆེ་བརྡབས།)

ལོ་རྒྱུས་ཁྲོད་འཛམ་གླིང་འདིའི་ནང་བཙན་གནོན་དང་གཉའ་གནོན་མྱོང་མཁན་ཚོར་རང་དབང་དང་རེ་བའི་གསུང་འཕྲིན་སྩོལ་མཁན་ཚོའི་མཉམ་དུ་ང་ཚོས་སྤོབས་པ་ཆེན་པོས་སྔ་ཕྱི་ཀུན་ཏུ་ལངས་ཡོད། འདི་ནི་ང་ཚོ་ཚང་མ་ཐག་རིང་དུ་འཚོ་གཞེས་མཛད་པའི་ཆོས་ཀྱི་དབུ་འཁྲིད་བཟང་པོ་འདིར་ཕྱོགས་དགོས་པའི་རྒྱུ་མཚན་དེ་རེད། དེ་རིང་ང་ཚོས་ཁོང་ཞི་བདེ་དང་བཟོད་སྲན་གྱི་ཡོངས་ཁྱབ་མཚོན་རྟགས་དང༌། དད་དམ་ཅན་རྣམས་ཀྱི་ལམ་སྟོན་པ། གང་གི་མི་མང་རྣམས་ཀྱི་ཆེད་རེ་བའི་མེ་ལྕེ་སྲུང་སྐྱོང་མཛད་པོ་བཅས་སུ་མངོན་བསྟོད་ཞུ་བཞིན་ཡོད།

ངས་ྋགོང་ས་མཆོག་ལ་ངོས་འཛིན་འདི་དག་ཐོབ་པར་བཀྲ་ཤིས་བདེ་ལེགས་ཞུ་རྒྱུ་ཡིན། ང་རང་ཁྱེད་དང་ལྷན་དུ་འདིར་བཅར་རྒྱུ་བྱུང་བར་ཧ་ཅང་སྐལ་བ་བཟང་པོར་ཚོར་བྱུང༌། ྋགོང་ས་མཆོག །ང་དང་ངའི་ལྕམ་ལའོ་ར་(Laura)གཉིས་ཀྱིས་ཨ་རི་བ་ཡོངས་དང་མཉམ་བོད་ཀྱི་མི་མང་ཚོར་བཀྲ་ཤིས་ལུགས་ལེགས་དང་ཞི་བདེའི་དུས་བཟང་ཤར་བའི་སྨོན་ལམ་གདུང་ཤུགས་དྲག་པོས་ཞུ་རྒྱུ་ཡིན།

ད་ནི་གྲོས་ཚོགས་གོང་མའི་ཚོགས་གཙོ་མཆོག་དང་ཚོགས་མི་བྷའེ་ར་ཌེ་(Byrd)མཆོག་ཕེབས་ཏེ། ང་དང་ལྷན་དུ་གསེར་གྱི་རྟགས་མ་བསྟར་འབུལ་ཞུ་རྒྱུར་མཉམ་ཞུགས་གནང་རོགས་ཞུ་རྒྱུ་ཡིན།། །། (ཡིད་མོས་ཀྱི་ཐལ་མོ་བརྡབས།)

2 comments:

  1. This comment has been removed by the author.

    ReplyDelete
  2. སྣ་མང་རང་བཞིན་འདི་ནི་བརྟན་ལྷིང་མེད་པའི་རྒྱུ་རྐྱེན་མ་ཡིན་པར་སྟོབས་ཤུགས་ཀྱི་འབྱུང་ཁུངས་རེད། སྐད་ཆ་དེས་ང་རང་ཡིད་དབང་མེད་དུ་འཕྲོག། དེ་ནས་བཟུང་ང་རང་བྷུ་ཤུ་ལ་དགའ་མོས་ཆེན་པོ་སྐྱེས། ཁོང་གི་བློ་རྒྱ་དེ་ལ་ང་རང་ཡིད་སྨོན་ཤོར། ང་ཡི་བློ་ལ་བབས་པའི་གཏམ་བཤད་གཅིག་ལ་འདི་ལས་ལྷག་པ་ཞིག་བྱུང་མ་མྱོང༌། ཆུང་ས་གཅིག་ནས་བཤད་ན། མེ་དང་ཆུ་གཉིས་མཐུན་གྱི་མེད་ཀྱང༌། ཐབས་ལ་མཁས་ན་དེ་གཉིས་བེད་སྤྱད་བྱས་ནས་རལ་གྲི་ལ་རྣོ་ངར་ལྡུད། ཆུ་ཡིས་གློག་འདོན། གློག་གིས་ཆུ་འདྲེན། བེད་སྤྱོད་མ་ཤེས་ན་ཆུ་ཡིས་མེ་གསོད། མེ་ཡིས་ཆུ་སྐམ།
    ང་རང་ཚོའི་སྤྱི་ཚོགས་ནང་དེ་འདྲའི་བློ་རྒྱ་ཆེ་ཞིང་ཐབས་ལ་མཁས་པ་མང་དུ་འབྱུང་བ་ཤོག །ཆོལ་ཁ་དང་ཆོས་ལུགས་མི་འདྲ་བ་དེ་ཚོ་བརྟན་ལྷིང་མེད་པའི་རྒྱུ་རྐྱེན་དུ་མ་བསྒྱུར་བར་སྟོབས་ཤུགས་ཀྱི་འབྱུང་ཁུངས་སུ་བསྒྱུར་བར་སྨོན། རྒྱ་ནག་ནང་དུའང་དེ་འདྲའི་བློ་རྒྱ་ཆེ་བའི་མི་ཁ་ཤས་འབྱུང་བར་སྨོན།

    ReplyDelete