དཔྱོད་ལྡན་གངས་ཐིགས་ལགས་སུ་ལན་དུ་ཕུལ་བ།

མཁྱེན་ལྡན་གངས་ཐིགས་ལགས།
                                 སྐུ་ཁམས་བཟང། ཉིད་ཀྱིས་བཞག་པའི་དྲི་བ་ཁག་དེ་རིང་གཞི་ནས་མཐོང་བྱུང། ལན་མདོར་བསྡུས་སུ་འབུལ་ཐབས་ཞུས་པ་གཤམ་གསལ།

༡༽ ཕྲན་གྱི་ཟིན་བྲིས་འདི་ལས་ཞོར་དུ་ཚོད་ལྟ་ལྟ་བུར་སྤེལ་བ་ཞིག་ཡིན། ལ་ལས་ཆ་ཚང་གཟིགས་ཐུབ་ཀྱི་འདུག་ཟེར། ལ་ལས་གཟིགས་ཐུབ་ཀྱི་མི་འདུག་ཟེར། ལ་ལས་ཡིག་གཟུགས་ཆེ་འདུག་ཟེར། ལ་ལས་ཆུང་འདུག་ཟེར། ལ་ལས་དབུ་མེད་ཤར་གྱི་འདུག་ཟེར། ལ་ལས་ཡིག་གཟུགས་གང་ཡིན་མི་ཤེས་པ་ཞིག་ཤར་གྱི་འདུག་ཟེར། ཕལ་ཆེར་རང་རང་གི་ལས་བཀོད་བཞིན་རྣམ་པ་སྣ་ཚོགས་སུ་ཤར་བཞིན་ཡོད་པ་འདྲ། རྩ་བ་གཏུགས་ན་ང་རང་གི་ལག་རྩལ་ལ་ཐུག་ཡོད་པར་སེམས། དེ་རིང་བསྐྱར་སྒྲིག་བྱས་ཡོད་པ་འདི་ཚང་མས་ལེགས་པར་གཟིགས་ཐུབ་པའི་རེ་བ་ཡོད།

༢༽ བོད་ཀྱི་ཡིག་སྒྱུར་མཁན་ཚོས་ངེས་པར་ནང་འདྲེན་བྱེད་དགོས་པ་གང་ཡིན་ཐད། ང་རང་གི་ལྟ་སྟངས་ཞུས་ན། སྔར་ཡོད་ཁ་སྐོང་དང་སྔར་མེད་རིག་གནས་ནང་འདྲེན་བྱེད་དགོས་པ་དེ་གཙོ་བོ་རེད་སྙམ། སྔར་ཡོད་བོད་ཀྱི་གསོ་བ་རིག་པ་ལྟ་བུར་མཚོན་ན། ཙ་ར་ཀ་མདོ་བརྒྱད་༼དག་ཆ་ཇི་བཞིན་མི་དྲན་༽ལྟ་བུ་བོད་ཀྱི་གསོ་རིག་གི་གཞུང་འགར་ལུང་དྲངས་པ་ཙམ་ལས་གཞུང་ཆ་ཚང་བ་བསྟན་དུ་མེད། དེ་བཞིན་སྙན་ངག་ལ་མཚོན་ནའང་དཎ་ཌིའི་གཞུང་དང་འབྲེལ་ཡོད་མང་པོ་ད་དུང་བསྒྱུར་མེད། དེ་དག་བསྒྱུར་དགོས་པ་ཧ་ཅང་གལ་ཆེན་རེད་སྙམ། དེ་བཞིན་བོད་ཀྱི་རྒྱལ་རབས་ལོ་རྒྱུས་ལྟ་བུར་ཆ་མཚོན་ནའང། དུས་རབས་བཅུ་དགུ་པ་ནས་ད་ལྟ་བར་གྱི་བོད་ཀྱི་ལོ་རྒྱུས་རྣམས་བོད་ཡིག་ནང་གསལ་པོ་དང་ཆ་ཚང་བ་མེད། དབྱིན་ཡིག་ནང་མང་བ་ཡོད། དེ་དག་ཀྱང་བོད་སྐད་དུ་ཕབ་སྒྱུར་རམ་གསལ་པོ་བཟོ་མ་ཐུབ་ཚེ། ནམ་ཞིག་བོད་ཡིག་འདིས་བོད་ཀྱི་ལོ་རྒྱུས་ཆ་ཚང་བ་ཡང་སྦྱོང་མི་ཐུབ་པར་གྱུར་ཉེན་ཡོད།

སྔར་བོད་དུ་མེད་པའི་རིག་གནས་ཁོངས་སུ་རྣམ་གྲངས་ཧ་ཅང་མང་ལ་རྒྱ་ཆེ་ཡང། གཙོ་བོ་ཚན་རིག་དང་སྤྱི་ཚོགས་ཀྱི་ལམ་ལུགས་དང་འབྲེལ་བའི་གཞུང་ལུགས་རྣམས་ཕབ་སྒྱུར་བྱེད་དགོས་པ་དེ་ཧ་ཅང་གནད་ཆེན་རེད་སྙམ། ཚན་རིག་ལྟ་བུའི་གཞུང་ལུགས་བསྒྱུར་བར་དཀའ་ཚེགས་ཧ་ཅང་ཆེན་པོ་རེད་འདུག ཕྲན་པས་ ༢༠༠༧ ལོར་འཛིན་རིམ་ ༨ པའི་ཚན་རིག་སློབ་དེབ་བོད་ཡིག་ཏུ་བསྒྱུར་བ་ཡིན། དེ་ནི་དབྱིན་སྐད་ཤེས་པ་དང་བོད་སྐད་ཤེས་པ་ཙམ་གྱིས་བསྒྱུར་ཐུབ་པ་ཞིག་རེད་མི་འདུག ཚན་རིག་གི་གཞུང་དང་འབྲེལ་བའི་ཤེས་ཚད་མེད་ན་སྒྱུར་ཐབས་བྲལ་འདུག ངས་ཚན་རིག་གི་སློབ་དེབ་གཅིག་བསྒྱུར་བར་འཛིན་གྲྭ་དང་པོ་ནས་བདུན་པ་བར་གྱི་སློབ་དེབ་ཆ་ཚང་ལ་བལྟ་དགོས་བྱུང་ལ། དཔྱད་གཞིའི་རྒྱུ་ཆ་བརྒྱ་ཕྲག་ཁ་ཤས་ལ་བལྟ་དགོས་བྱུང། དེ་ལྟར་བྱས་ཏེ་བསྒྱུར་རུང་ད་དུང་བརྒྱ་ཆ་བདུན་ཅུ་བརྒྱད་ཅུ་ཙམ་གྱི་གདེང་ལས་མི་འདུག ད་ལྟ་ཚན་རིག་སྐོར་གྱི་ཤེས་བྱ་ཤེས་རིག་དང་བོད་ཀྱི་དཔེ་མཛོད་ཁང། བོད་ཁྱིམ་ཤེས་ཡོན་འཕེལ་རྒྱས་སྡེ་ཚན། རིགས་ལམ་སློབ་གྲྭ་སོགས་ཀྱིས་ཕབ་སྒྱུར་གནང་བཞིན་ཡོད་ཀྱང། ཚང་མས་བསྒྱུར་དང་སྒྱུར་བཞིན་པ་དེ་དག་ཚན་རིག་གི་རྨང་གཞིའི་ཤེས་བྱ་ཙམ་རེད་མ་གཏོགས། རྩ་བའི་གཞུང་ཆ་ཚང་བ་མ་རེད། དེར་བརྟེན་ད་ཕྱིན་ང་ཚོས་སྔོན་གྱི་ལོ་ཙཱ་བ་རྣམ་པ་ལྟར་རྩ་བའི་གཞུང་ལུགས་ཆ་ལག་ཚང་བ་བསྒྱུར་ཐུབ་ཐབས་གནང་དགོས་འདུག དེ་མིན་འདི་མུར་བསྡད་ན་ཁ་གཡབ་གཡབ་ཙམ་ལས་གཏིང་ཕྱིན་པ་རྩ་བ་ནས་ཡོང་ས་མ་རེད།

༣༽ ཕྲན་གྱིས་ཡིག་སྒྱུར་བྱེད་སྐབས་ཚིག་མཛོད་སོགས་གང་དག་བེད་སྤྱོད་བྱེད་མིན་གྱི་ཐད། སྤྱིར་བཏང་ཚིག་མཛོད་གང་ལ་བལྟས་ནའང་ལེགས་ཆ་རེ་མེད་པ་གཅིག་ཀྱང་མི་འདུག འོན་ཀྱང་ཐམས་ཅད་ཀྱི་གོ་ཆོད་པའི་ཚིག་མཛོད་གཅིག་འཁྱེར་ཤོག་ཟེར་ན་ཕལ་ཆེར་རྩ་བ་ནས་ཡོད་མ་རེད་ཅེས་བཤད་ན་འགྲིག་གི་རེད། ངས་ཡིག་སྒྱུར་བྱེད་དུས་དབྱིན་བོད་ཚིག་མཛོད་ཁོངས་གདོང་ཐོག་རིན་པོ་ཆེའི་ཚིག་མཛོད་སྣང་བ་གསར་པ་དང། ཀརྨ་སྨོན་ལམ་གྱི་དབྱིན་བོད་ཚིག་མཛོད་གསར་མ། བཀྲ་ཤིས་ཚེ་རིང་གི་དབྱིན་བོད་རྒྱ་གསུམ་ཤན་སྦྱར་གྱི་ཚིག་མཛོད་སོགས་བཀོལ་གྱི་ཡོད། བོད་དབྱིན་ཚིག་མཛོད་ལ་མཚོན་ན། གྷོལྜ་སེྚན་གྱི་བོད་ཀྱི་དེང་རབས་ཚིག་མཛོད་ཅེས་པའི་དེབ་ཆེན་དེ་བེད་སྤྱོད་བྱེད་ཀྱི་ཡོད། དབྱིན་ཡིག་ལ་མཚོན་ན། Encarta ཚིག་མཛོད་དང། Encarta ཤེས་བྱ་ཀུན་བཏུས་ཆེན་མོ། དབྱིན་སྐད་ཀྱི་གཏམ་དཔེ་དང་ཚིག་དུམ། ལེགས་བཤད་སོགས་ཀྱི་ནང་དོན་རྟོགས་ཐབས་སུ་ Oxford-Idioms དང། Oxford-Phrasal Verbs ལྟ་བུ་རྒྱུན་དུ་བཀོལ་གྱི་ཡོད། དེ་མིན་ཚན་རིག་གི་སྐོར་བསྒྱུར་དུས་བསྒྱུར་བྱའི་ནང་དོན་དང་ཆེད་དུ་འབྲེལ་བའི་དབྱིན་ཡིག་ཚིག་མཛོད་བེད་སྤྱོད་བྱེད་ཀྱི་ཡོད། སྔོན་མ་རྡོ་རྗེ་གདན་གྱི་མཆོད་རྟེན་ནང་ནས་ A Manual Of Chinese Tibetan and English Words ཞེས་པའི་ཚིག་མཛོད་དམར་པོ་ཆུང་ཆུང་ཞིག་ཉོས་པ་ཡིན། དེ་ཡང་ཕན་ཐོགས་ཆེན་པོ་འདུག

༤༽ a death of old. ཞེས་པ་དེ་ཐད་ཀར་བསྒྱུར་ན། ན་རྒས་ཀྱི་འཆི་བ་ཞིག་ཅེས་དང། a birth of new ཞེས་པ་དེ་གསར་པའི་འཕེལ་ཁ་ཞིག་ལྟ་བུ་མིན་ནམ། བོད་སྐད་ཀྱི་བཤད་སྟངས་ལྟར་བསྒྱུར་ན། སྔ་མ། རྒས་ཏེ་འཆི་བ་དང། ཕྱི་མ་ནི། གསར་བཙས་སམ་གསར་དུ་བཙས་པ་ལྟ་བུར་བསྒྱུར་འོས། གཙོ་བོ་མ་ཡིག་གི་བསྟན་དོན་ནམ་སྐབས་དོན་ངོ་མ་ཅི་ཡིན་མིན་དེ་ཤེས་དགོས་པ་གནད་འགག་རེད། དེ་མིན་ཚིག་དུམ་འཁྱེར་ཡོང་སྟེ་བསྒྱུར་ན་དོན་ལ་གནས་པ་དཀའ། དཔེར་ན། Death ཞེས་པ་དེ་ཉམས་ཉེས་དང་རྩ་མེད་སོགས་མང་པོར་འཇུག་པའི་སྐབས་ཡོད་པ་ལྟ་བུ་ལགས། དེ་ཙམ་ཡིན། ཕྲན་ཆུང་ཚེ་རིང་པས་ལས་གསེང་དུ་བྲེལ་སྟབས་སུ་ཕུལ།། །།