2014-06-18

ཤིན་ཏུ་གསལ་བའི་དྲན་ལ་མ་དྲན་ཁྱེད།

གསལ་ལ་མི་གསལ་དྲན་ཤེས་འདི་ཡི་ནང་།།
འདྲིས་ལ་མ་འདྲིས་ཁྱེད་རང་བརྟན་པོར་གནས།།
ཞིམ་ལ་མ་ཞིམ་ཞོག་ཁོག་བག་ལེབ་དེ།།
རྒྱགས་ལ་མ་རྒྱགས་ད་དུང་བཟའ་བཞིན་དུ།།

ཆར་གྱིས་བཀྲུས་པའི་ཡུལ་ལྗོངས་འདི་ཡི་ནང་།།
མིག་ཆུས་ཁེངས་པའི་སྒྲུང་ཞིག་ཡོད་རེད་ཟེར།།
ཀྱ་གེ་ཀྱོག་གེའི་རི་ལམ་དེ་ཡི་ངོས།།
སུ་ཡིས་སུ་ཞིག་དྲན་བཞིན་བསམ་བཞིན་དུ།།

རི་འགོ་དེ་ནས་ཤུགས་པའི་བསང་ཞིག་ཕུལ།།
ཐལ་མོ་སྙིང་གར་སྦྱར་ཏེ་འཕྲིན་ལས་བཅོལ།།
དར་ལྕོག་དེ་ཚོས་སུ་ཞིག་བརྗེད་པ་མེད།།
གཟུངས་སྔགས་དེ་ཚོ་ཆར་ཆུས་ཟུབ་བཞིན་དུ།།

ཆུ་མིག་དྭངས་གཙང་ནང་ན་མིག་ཟུང་གསལ།
རི་ཞིང་ཆུང་ཆུང་ནང་ན་འཛུམ་མདངས་འཁྱིལ།།
གཅིག་ལས་གཅིག་མཐོའི་རི་ཚོགས་དེ་ཚོའི་སེམས།།
དགའ་སྤྲོས་མྱོས་པ་བརྩེ་བས་ཚོར་བཞིན་དུ།།