2015-08-25

སྙིང་གི་ཇ།

གཟའ་འཁོར་གཉིས་ཀྱི་གོང་གི་རེས་གཟའ་སྤེན་པའི་ཉིན། ངས་ནམ་རྒྱུན་བཞིན། བོད་མི་བགྲེས་སོང་ ༡༨ ཙམ་མཛེས་སྡུག་ལྡན་པའི་སྤྱི་གླིང་ཞིག་ཏུ་སྤྲོ་གསེང་ལ་འཁྲིད། ཉིན་གུང་གི་སྐབས་སུ་ཨ་མ་ལགས་གཅིག་གིས་ང་ལ་བོད་ཇ་ཕོར་པ་ཆེན་པོ་གང་གནང་བྱུང་བ་དེ་ཧ་ཅང་ཞིམ་པས་ལམ་སང་བཏུང་པ་ཡིན། དེ་འཕྲལ་ཁོང་གིས་ཡང་བསྐྱར་ཇ་དེམ་བཀྱག་སྟེ་ཨུ་ཚུགས་ཀྱིས་ཡང་བསྐྱར་ཕོར་པ་ཆེན་པོ་དེ་གང་བླུགས་བྱུང་། ངས་ཉིན་གུང་གི་ཁ་ལག་བཟའ་བཞིན་ཇ་དེ་བཏུང་པ་མ་ཟད། བགྲེས་སོང་ཚོར་ཁ་བརྡ་བྱས་པ་ཡིན།

ང་རང་སྐྱིད་པའི་རང་ཡུལ་དང་བརྩེ་བའི་ཕ་མ་བཞག་སྟེ་ལོ་མང་སོང་ཞིང་། དུས་ཡུན་དེའི་རིང་ངའི་ཕ་མ་གཉིས་འདས་གྲོངས་སོང་། ད་ལྟ་གཞན་ཡུལ་དུ་བོད་མི་བགྲེས་སོང་ཚོ་དང་མཉམ་དུ་ལོགས་སུ་འཛོམས་ཏེ་ཁོང་ཚོར་ཞབས་ཕྱི་ཕྲན་བུ་ཞུ་རྒྱུ་བྱུང་དུས་ང་རང་གི་དྲིན་ཅན་ཕ་མ་གཉིས་དྲན་སོས་འོང་བ་ནི་སྤྱིར་བཏང་གི་གནས་ཚུལ་ཞིག་རེད་ལ། ང་རང་བགྲེས་སོང་ཚོའི་མཉམ་དུ་དུས་ཚོད་གཏོང་རྒྱུར་དགའ་དོན་ཡང་དེ་རེད།