གཉིས་ཀའི་སེམས་ན་གསལ་བའི་དུས་ཚོད་དེར།།
སྐྱེལ་མི་འགྲོ་མི་བྲལ་སའི་ས་མཚམས་སུ།།
ཁྱེད་ཀྱིས་སེམས་པ་དྲོན་མོའི་མིག་ཆུ་ཡིས།།
ང་ལ་སྐྱེལ་མ་བྱས་པའི་མེ་ཏོག་ཡོད།།
ཁ་བྲལ་མེད་ན་མཉམ་འཛོམས་ག་ལ་ཡོད།།
འཛོམས་པ་མེད་ན་བྲལ་བ་ཅི་ལ་སྲིད།།
སེམས་དང་སེམས་པ་འཁྱུད་པའི་བརྩེ་དུང་དེ།།
བྲལ་འཛོམས་སྐབས་ཀྱི་ཞིམ་མངར་འོ་ཡིས་མཚོན།།
སྙིང་གི་གཏམ་དག་ཡོངས་རྫོགས་བཤད་ཟིན་ཀྱང་།
ད་དུང་སྙིང་འདིས་ཅི་ཞིག་བཤད་འདོད་འདྲ།།
བརྩེ་ཞིང་དགའ་བའི་རྣམ་འགྱུར་ཡོངས་བསྟན་ཀྱང་།།
ད་དུང་སེམས་འདིས་གང་ཞིག་བསྟན་འདོད་འདུག །
“ལམ་ལ་གཟབ་གཟབ་གཟུགས་པོར་ཅ་ག་གནང་།།”
“ཐུགས་ཁྲལ་མ་གནང་མགྱོགས་པོ་ཐུག་ཡོང་ངོ།།”
སྤྱིར་བཏང་སྤྱིར་བཏང་ཅན་གྱི་ཚིག་འདི་དག །
སྤྱིར་བཏང་མིན་པའི་སེམས་ཚོར་དྲག་པོས་བརྗོད།།
དལ་གྱིས་འགྲོ་བཞིན་ཁྱེད་ལ་ལག་གཡུག་བྱས།།
མདུན་དུ་སྐྱོད་བཞིན་ཕྱི་མིག་ཡང་ཡང་བལྟས།།
ཇེ་རིང་ཇེ་རིང་འགྲོ་བའི་གཟུགས་པོ་གཉིས།།
ཇེ་ཉེ་ཇེ་ཉེའི་སེམས་ཀྱི་ལྡོག་ཕྱོགས་ཆགས།།
ཁྱེད་ཀྱི་སེམས་ནས་སྨོན་འདུན་ཤིང་ལོ་འཕྱུར།།
ང་ཡི་སེམས་ནས་ལྷག་བསམ་བྱ་སྒྲོ་བཅངས།།
སྙིང་གི་བརྩེ་བ་མཚོན་པའི་ལག་པ་ཟུང་།།
ཐལ་མོ་སྦྱར་ཏེ་གསོལ་བ་སྨོན་ལམ་བཏབ།།
ང་རང་སོང་ཡང་སྙིང་ནི་ལུས་སོང་སྙམ།།
ཁྱེད་རང་བསྡད་ཀྱང་སྙིང་ནི་འཁྱེར་སོང་དྲན།།
གང་ལའང་བྲོ་བ་མེད་པའི་ལན་ཚྭའི་ཆུས།།
བརྩེ་དུང་རྒྱ་མཚོའི་ཟབ་ཚད་ངེས་པར་མཚོན།།
ཡར་འགྲོ་མར་འགྲོའི་མི་ཚོགས་འདི་དག་གི །
སེམས་རྩ་དེད་ན་དཀའ་ངལ་སྣ་རེ་མཆིས།།
ཕར་སྣོལ་ཚུར་སྣོལ་ལམ་ཁ་འདི་དག་ཀྱང་།།
སེམས་ཀྱི་ལམ་ཁ་འདི་ལ་སྦྲེལ་ནས་ཡོད།།
སྔོན་ཆད་འདི་ལྟར་ག་ཚོད་བྲལ་ཡོད་དམ།།
ཕྱིན་ཆད་འདི་ལྟར་ག་ཚོད་བྲལ་དགོས་སམ།།
ཁ་བྲལ་སྐབས་ཀྱི་གདུང་བ་ལྕི་མོ་དེ།།
མཉམ་འཛོམས་དགའ་སྤྲོས་ག་ཚོད་གསབ་ནུས་སམ།།
བྲལ་བ་ལུས་ལ་ཡོད་ཀྱང་སེམས་ན་མེད།།
ཟད་པ་ནོར་ལ་མཆིས་ཀྱང་བརྩེ་བར་མིན།།
ཕན་ཚུན་ཡིད་ཆེས་གཙང་མས་སྦྲེལ་ཚར་ན།།
མཉམ་འཛོམས་དུས་དེ་མི་རིང་ཡིད་ཆེས་ཡོད།། །།
ལྡི་ལི་གསར་པའི་གནམ་ཐང་ནས་སྔོན་གྱི་ཚུལ་དྲན་ནས་ཤར་མར་ཡི་གེར་སྤེལ་བའོ།། །།
དངོས་ནས་སྙན་པོ་འདུག་ ཕལ་ཆེར་མཚམས་ལགས་དྲན་པའི་སེམས་འཚོར་ཡིན་བ་འདྲ་ འོན་ཀྱང་བྲལ་འཛོམས་ཀྱི་སེམས་འཚོར་དེ་སུ་ལ་ཡང་ཡོང་སྲིད་པ་ཞིག་རེད།
ReplyDeleteསྙན་ངག་འདི་སྙན་པོ་འདུག ཚིག་རྐང་ཁ་ཤས་བློ་ལ་འགྲོ་པོ་བྱུང་། "སྙིང་གི་གཏམ་དག་ཡོངས་རྫོགས་བཤད་ཟིན་ཀྱང་།
ReplyDeleteད་དུང་སྙིང་འདིས་ཅི་ཞིག་བཤད་འདོད་འདྲ།།བརྩེ་ཞིང་དགའ་བའི་རྣམ་འགྱུར་ཡོངས་བསྟན་ཀྱང་།།ད་དུང་སེམས་འདིས་གང་ཞིག་བསྟན་འདོད་འདུག །སྤྱིར་བཏང་སྤྱིར་བཏང་ཅན་གྱི་ཚིག་འདི་དག །སྤྱིར་བཏང་མིན་པའི་སེམས་ཚོར་དྲག་པོས་བརྗོད།།ང་རང་སོང་ཡང་སྙིང་ནི་ལུས་སོང་སྙམ།།ཁྱེད་རང་བསྡད་ཀྱང་སྙིང་ནི་འཁྱེར་སོང་དྲན།།་་་་་་་་"
མཚན་མི་གསལ་བའི་གྲོགས་པོ་ཁྱེད་ཅག་གིས་རྩོམ་འདིར་མཉེས་པོ་གནང་བར་ཐུགས་རྗེ་ཆེ། རྩོམ་ཡིག་འདི་ཐོལ་བྱུང་དུ་བྲིས་པ་ཞིག་ཡིན་སྟབས་ད་དུང་བཟོ་བཅོས་དགོས་ས་ཁ་ཤས་འདུག
ReplyDeleteངས་གཅིཡག་ཀློག འོན་ཀྱང་ང་ནི་མང་ཆེ་ང་བ་མགོ་འཇུག་ལོག་མཁན་ཡིན་པས། ཕ་ཡི་སྙན་རྩོམ་སྙན་ཚིག་འདྲ། །བུ་ཡི་ཉིན་ཐོ་དོ་ཧ་འདྲ། །བྱུང་།།
ReplyDeleteསྐུ་ཞབས་ལགས། དོ་ཧ་ཟེར་ན་ག་རེ་རེད།
ReplyDeleteགྲོགས་པོ་འགས་དེང་སང་རྒན་ཆུང་ལགས་ཀྱིས་སྙན་ངག་འབྲི་བཞིན་འདུག་ཟེར། དེ་ནི་བདག་ལ་མཚོན་ན་རེ་སྒུག་གི་གཏམ་བཟང་ཞིག་ཡིན། ཡང་གྲོགས་པོ་འགས་ཁོང་སྙན་ངག་གི་བཟང་བཙོན་ལས་ཐར་འདུག་ཟེར། དེ་ཡང་བདག་ལ་སྔར་བཞིན་གཏམ་བཟང་རེད།
ReplyDeleteང་ལ་མཚོན་ནའང་རྒན་ཆུང་ལགས་ཀྱི་རྩོམ་ཡིག་ནི་རེ་སྒུག་བྱེད་ས་ཞིག་ཡིན། ཁོང་གིས་དཔྱད་རྩོམ་དང་སྙན་ངག ཡིག་སྒྱུར། སྒྲུང་སོགས་ག་རེ་གནང་ནའང་སྤུས་ཚད་ལེགས་ཤིང་གོ་བདེ། ལྷག་པར་སྙན་ངག་གི་ཚིག་གཤིས་འཇམ་ཞིང་སྙན་ལ། ནང་དོན་རྟོགས་བདེ་བ། ཚོར་སྣང་ཤུགས་ཆེན་པོ་སྤྲོད་ཐུབ་པ་ཞིག་ཡིན། འོན་ཀྱང་ལོ་བཅུ་གྲངས་ནང་ཁོང་གིས་སྒྱུ་རྩལ་རྩོམ་ཡིག་འབྲི་མཚམས་བཞག་པ་དེར་བློ་ཕམ་ཡོད་ལ། ད་ཆ་ཡང་བསྐྱར་སྙན་ངག་གི་འཇིག་རྟེན་དུ་ཕེབས་པར་དགའ་སྤྲོ་ཆེ། ཡིག་སྒྱུར་གནང་ན་ལེགས་ཀྱང་། དེ་ཚོ་ནི་མི་གཞན་གྱིས་བརྩམས་པ་རེད། སོ་སོས་གསར་རྩོམ་གནང་སྟེ་མུ་མཐུད་དེ་ང་ཚོའི་ཡིད་དབང་འགུག་རོགས། བལ་ཡུལ་ནས་རྒྱལ་མཚན་ཆོས་བཟང་གིས་ཕུལ།།
ReplyDeleteསྣང་གསལ་ལགས་དང་རྒྱལ་མཚན་ཆོས་བཟང་ལགས་ཀྱིས་གདེང་འཇོག་དང་སྐུལ་མ་གནང་བར་ཐུགས་རྗེ་ཆེ།
ReplyDeleteསྒྲིག་གཞི་བཙན་པོས་ལག་ཟུང་དམ་དུ་བསྐྱིགས།།
གུ་དོག་ལྕགས་ཁྲས་རྣམ་ཤེས་བཙོན་དུ་བཅུག །
ཕྲག་དོག་ཐོ་བས་སྨྱུ་གུའི་རྣོ་དབལ་རྟུལ།།
སྙན་ངག་མཁན་གྱིས་མྱངས་པ་ཉུང་ཉུང་མིན།།
ཚར་མེད་ལས་ཀྱིས་གསར་གཏོད་གཤོག་པ་བཅད།།
ཟིན་མེད་བྱ་བས་སྙིང་གི་ཟུངས་ཀྱང་གྲོན།།
བྱས་པ་རྗེས་མེད་མཚན་མོ་རིང་རིང་པོར།།
མིག་མཐའ་བརླན་པའི་བྱིའུ་ང་བདེ་མ་མྱོང་།།
གཞིས་བྱེས་གཞུང་འདིར་ཞེན་པ་ལྷད་མེད་ཡིན།།
རང་ནུས་འདོན་པའི་ལས་ཤིག་ཅང་མ་སྩལ།།
གཞུང་ཡིག་ལས་བསྡོམས་བྲིས་ནས་སྨྱུ་གུ་ཟད།།
དེ་ཚོའི་བར་དུ་སྙན་ངག་ཇི་ལྟར་འཁྱོངས།།
དགྱེས་ཁའི་སེམས་ཀྱི་འཚོར་བ་སྐྱུར་མོ་འདི།།
ReplyDeleteནག་ནོག་ཤོག་བུར་སྤྲིངས་པར་བྱས་འགྱུར་ཀྱང་།།
སེམས་ཀྱི་དཀའ་སྡུག་སེམས་ཀྱི་འཁུར་བ་ལས།།
ཤོག་བུས་འཁེར་ན་སེམས་ཚོར་རྫུན་མར་སྣང་།།
འཛོམས་བྲལ་འཚོ་བ་ལྕི་མོ་འདིས།།
ལུས་སེམས་གནར་བའི་ལོ་རྒྱུས་མང་།།
ཉམས་ཆུང་བརྩེ་དུང་ཟབ་མོ་འདི།།
སྟོབས་ཆུང་འབྱུང་བས་བཅོམ་མ་ནུས།།
སེམས་སྡུག་གྲོགས་ལ་བཤད་ཚེ་ཡང་སྣང་ཤར།།
ReplyDeleteསྐྱོ་གླུ་དབྱངས་སུ་བླངས་ན་བདེ་སྣང་སྐྱེ།།
སེམས་གསང་ཤོག་བུར་བཀོད་པས་ཚིམ་གྱུར་པ།།
སྔར་ཡང་མང་བྱུང་ད་ཡང་འདི་ན་མཆིས།།
སྒྱུ་རྩལ་ཞེས་གྲགས་ལྷ་བུ་འདྲ་བ་དེ།།
ས་ལ་ཕབ་ན་རང་སེམས་མཚོན་བྱེད་ཙམ།།
བརྩེ་བ་ཞེས་གྲགས་ས་གྲགས་གནམ་གྲགས་དེ།།
དངོས་སུ་མྱངས་ན་ཕལ་ཆེར་འདོད་ཆགས་ཙམ།།
ཕན་ཚུན་གསང་བ་མེད་ཅིང་དམ་ཚིག་གཙང་།།
ཆགས་བཅས་རྒྱུད་དག་ལྡན་པའི་གཤིས་བཟང་གིས།།
ཕན་ཚུན་འདོད་དང་མི་འདོད་ཡོངས་ཤེས་པ།།
འཇིག་རྟེན་འདི་ཡི་བརྩེ་བར་འཇོག་ཏུ་རུང་།།
དེ་མིན་གཟུགས་ཙམ་ལ་ཆགས་ཆགས་པ་དེ།།
རྩྭ་རྩེའི་བད་འདྲ་འབྱུང་བས་ལམ་སེང་འཇོམས།།
གྲོགས་ཁྱེད་བརྩེ་དུང་བདུད་རྩིར་རོལ་འདོད་ན།།
གཟུགས་ལས་འདས་པའི་མཛེས་སྡུག་མྱོང་བ་གལ།།
འགྱུར་མེད་ཀྱི་དམ་བཅའ་ཞིག་གི་འདེད་ནས།
ReplyDeleteངས་གཡོ་ལྷད་མེད་པའི་དྭངས་གཙང་གི་སེམས་པ་འདི་འཁྱེར་ནས།
མཐའ་ཡས་པའི་བརྩེ་དུང་ཞིང་ཁམས་འདིར་འགྲིམས་དུས།
རོགས་ན་ཟླ་ཡི་ན་གཟུགས་མྱོང་བའི་བརྩེ་དུང་གི་སྨྲེ་ངག་འདོན་བཞིན།
ཡོད་ཚད་བརྩེ་དུང་གི་བྱས་ཉེས་སུ་བརྩིས་ནས་མཆོངས་ལ་ཐལ།
སེམས་གཉིས་ཀྱི་ཞེན་ས་ནི་ཆ་རྐྱེན་བྲལ་བའི་དྭངས་མའི་ཆུ་གཤེལ་ཞིག་ཡིན།
གཤེལ་གདངས་ཀྱི་ངོ་མཚར་འདིས་བསྒྲུན་མེད་ཀྱི་བརྩེ་དུང་འདིར་འོད་དཀར་ཞིག་སྒྲོན་ངེས།
ཆ་རྐྱེན་ནི་བརྩེ་དུང་ལ་ཡོང་མི་སྲིད།
ལྷད་མེད་ཀྱི་བརྩེ་དུང་ནི་ཆགས་པ་མིན།
འདི་ནི་ནམ་ཡང་འགྱུར་ཐབས་མེད་པའི་ལྷད་མེད་ཀྱི་འཚོར་བ་ཞིག་ཡིན།
ངོ་མ་།
ReplyDeleteཕྱིར་ལོག་ཤག
སྙན་ངག་ལ་དུང་བའི་མི་བོ་ཞིག
སྙན་ངག་གི་འཇིག་རྟེན་ནས་མཐར་གྱིས་བཞུད་དེ།
སླར་ཡང་ཧོད་ཀྱིས་ཕེབས་བྱུང་ཡ།
་
མཁས་པའི་སོར་རྩེས་དྲངས་པའི་ཚོར་གཏམ་སྙན།།
ReplyDeleteསྙན་མོའི་ཚིག་གིས་སྦྱོར་བའི་བརྗོད་དོན་ཟབ།།
ཟབ་པའི་དོན་གྱིས་མི་སེམས་ངང་གིས་འགུལ།།
འགུལ་བའི་སྙིང་ཆུང་ལོ་བསྙལ་བརྩེ་བས་བཟི།།
བཟི་བའི་གཏམ་དེ་དབང་མེད་ངག་ནས་ཤོར།།
ཤོར་བའི་ཚིག་འདི་དོན་སྦྱོར་ཅི་ལ་མཁས།།
མཁས་པ་མིན་ཡང་ཡིད་དད་དགའ་མགུའི་ཚིག།
མཁས་པ་ཁྱེད་ཀྱི་རྗེས་ཤུལ་རེ་རེ་ལ།
མཁས་པའི་ཟོལ་གྱིས་བསྟོད་གླུ་མི་འབུལ་ཅི་ལ་ཡོད།
གྱེས་བྲལ་འབྱུང་བ་གཞི་བྱེས་ཕ་བུའི་ལོ་རྒྱུས་ཡིན།
ReplyDeleteལྷ་འཛོམས་ཉིན་དེ་གཞི་བྱེས་ཕ་བུའི་རེ་རྒུག་ཡིན།
བྲལ་བའི་དུས་དེར་མཆི་མས་ཕེབས་སྐྱེས་མཛད་བྱུང་ལགས།
འཛོམས་པ་རྨིས་པས་མིག་མཐའ་རླན་པ་མི་ཉུང་ལགས།
བཟོད་པ་ལྷ་རྩེ་ནས།
ཆུང་ནས་སྙན་ངག་གོམས་པ་ཡི།། ཚེ་ལྡན་གཞུང་གི་ལས་ལ་ཞུགས།། རིང་རིང་ལོ་ངོ་བཅུ་བདུན་མཐར།། སླར་ཡང་སྙན་ངག་གླིང་ལ་ལོག། བྱས་འབྲས་ལག་རྗེས་ཐོན་དཀའ་ཡང་།། རང་སེམས་བདེ་བའི་ཁྱད་ཅིག་འདུག །དབང་ལྡན་མང་པོ་མི་དགྱེས་ཀྱང་།། དབང་མེད་མང་པོ་དགའ་བས་སྤྲོ།།
ReplyDeleteམཚན་མི་གསལ་བ་ཁྱེད་ཀྱིས་སྒྲ་རྒྱན་གྱི་ལམ་ནས་བསྔགས་བརྗོད་སྙན་པོ་ཞིག་གནང་བར་ཐུགས་རྗེ་ཆེ།
ReplyDeleteམཁས་པ་ཟེར་བའི་བཤུ་གཞོག་མཁན་དག་དང་། །
མཁས་དབང་ཟེར་བའི་དབང་ཅན་དེ་དག་གི །
གྲལ་དུ་མི་འཚང་བདག་ནི་བདག་རང་ཡིན། །
རང་མགོ་རང་གིས་མི་བསྐོར་ཆུང་ཚེ་ཡིན།།
སྙིང་གི་གཏམ་དག་སྙན་པའི་དབྱངས་སུ་ལེན།།
དགོས་པའི་ནོར་བུ་རང་གི་སྐད་དུ་བསྒྱུར།།
བསྒྲུབ་འོས་ཞབས་ཕྱི་སེམས་ཅན་ཀུན་ལ་ཞུ།།
བྱ་སྒྲོ་དཀར་པོའི་རེ་བ་དེ་ག་ཙམ།།
བཟོད་པ་ལྷ་རྩེ་ལགས། སྙན་ངག་འདི་བོད་ནང་གི་མཆོད་མེ་རྩོམ་རིག་དྲ་བའི་ལེགས་རྩོམ་ནང་དུའང་བཀོད་འདུག་ཅིང་། ཀློག་པ་པོ་ཁ་ཤས་ཀྱིས་ཁྱེད་དང་འདྲ་བར་བྲལ་འཛོམས་ཀྱི་བསྟན་དོན་དང་། གཞིས་བྱེས་གཉིས་ཀྱི་ལས་དབང་ལ་འབྲེལ་བ་ཡོད་པའི་ངོས་འཛིན་གནང་འདུག ཐུགས་རྗེ་ཆེ། ཡང་ཡང་ཕེབས་ནས་དགོངས་འཆར་གནང་རོགས།
ReplyDelete