ཟབ།

སྐར་མ་དྲན་པའི་ནམ་མཁའ་གནག །

དཔྱིད་རླུང་སྒུག་པའི་ས་གཞི་ཡངས།།

རླུང་གིས་བསྐྱོད་པའི་ལོ་འདབ་ཚོགས།།

བསུ་མ་རེད་དམ་སྐྱེལ་མ་རེད།།

ཚོར་སྣང་རྦ་རླབས་རབ་འཁྲུག་པའི།།

ང་ཡི་རྒྱ་མཚོ་གཏིང་ན་ལྷིང་།།

འཕྲལ་ཟས་འཛུམ་གྱི་ལྕགས་ཀྱུ་ན།།

སེམས་ཆུང་ཉ་མོའི་འགྲམ་ཆུ་འཁོར།།

ལོ་ངོ་སོང་བའི་ཆང་འདི་ལ།།

དྲི་ཞིག་འཐུལ་འདི་བརྩེ་བ་ཡིན།།

དུང་སེམས་མཚོ་མཐའི་རྐང་རྗེས་རྣམས།།

རླབས་ཀྱིས་བསུབ་ཀྱང་སེམས་ན་གསལ།།

འགྲོ་དང་འོང་དང་འཆར་དང་ནུབ།།

ཆགས་དང་སྡང་དང་དགའ་མི་དགའ།།

ཡེ་མེད་སེམས་ཀྱི་ཉི་མ་འདི།།

ཁྱེད་ལ་མཁོ་ན་ཁྱེད་ཀྱི་རེད།།

དལ་གྱིས་དལ་གྱིས་རིང་དུ་གྱེས།།

སྙིང་གི་མཚོ་ལ་དར་ཞིག་ཆགས།།

རོལ་དབྱངས་དེ་ཚོར་ཉན་བཞིན་དུ།།

སྙན་ངག་འདི་ཚོ་སུ་ལ་བྲིས།།

སེམས་ཀྱི་ཨོ་རོག་ནག་ཆུང་འདི།།

ཡང་ཡང་ཁྱེད་ཀྱི་རི་ལ་འཁོར།།

མངར་ཇའི་རླངས་པ་བན་བུན་ཡང་།།

རི་རྩེའི་སྨུག་པར་འཁྲུལ་བཞིན་མཆིས།།

རོལ་དབྱངས་ཆུ་མོ་དལ་གྱིས་བཞུར།།

ལོ་མ་ལྗོན་པའི་ལག་ནས་བྲལ།།

མི་འགྱུར་རྡོ་རྗེ་གང་ན་འདུག །

བྱ་སྒྲོ་དཀར་པོས་མཐོང་སྲིད་དམ།།

ཁོ་བོ་ནམ་ཞིག་དྲན་གྱུར་ན།།

རླུང་ཞིག་བསྔུབས་དང་དལ་མོར་ཀྱེ།།

སྦྲང་རྩི་ལྟ་བུའི་འཇམ་ཤ་དེས།།

མཚོ་མོའི་དར་ཁ་བཞུར་བར་ངེས།།

རྒྱ་མཚོ་བྲལ་བའི་ཉ་མོ་སྐྱོ།།

རྦབ་ཆུ་དྲགས་པའི་རི་ལམ་དོགས།།

ལྷབ་ལྷུབ་གཡོ་བའི་བྱ་སྒྲོ་འདི།།

བསུ་མ་རེད་དམ་སྐྱེལ་མ་རེད།། །།

 

(༢༠༡༣།༢།༡༦ མཚན་མོར་བྲིས།)